A Chronicle of London from 1089 to 1483 Part 25

m'c', m'. Rob't Clopton.

[Sidenote: Depe and Harfleu were lost thorugh defaute.]

[Sidenote: The duke of Burgoyne with a ryall power leyde sege to Caleys:]

[Sidenote: and there they sette there tentes a fyre, and wenten there way, and loste there stuff.]

[Sidenote: Oure lordes wenten into Flaundres and distroyed the town of Poperyng, and manye othere townes.]

[Sidenote: The kyng of Scottes leyde sege to the castell of Rokysburgh, and shamfully brak up the sege and wenten away.]

This same yere[121] upon Alle Halwe nyght, was the toun of Depe stole and take with Armynakes: and on newe yeres tyd nest folwynge the toun of Harflieu also, for defaute of good kepynge, the whiche kyng Herry the fyfthe gette before the bataill of Agincourt, with a strong sege and a ryall, first of alle the townes of Normandye. Also this same yere the ix day of Jule, the duke of Burgoyn with a ryal power leyde a sege to the town of Calys, and contynued unto the xxix day of the same monthe; and that day, blessyd be Almighty G.o.d, his male writhed, for a strong bastyll that he hadde mad upon the water syde was taken and distroied, and alle that were withinne sclayn unto the noumbre of v^{c} men oughttake iij persones, that is for to sey, a knyght, a prest, a frere, the whiche knyght seyde that the duke of Burgoyn was nought thre men from hym in the same bastill that tyme that he was taken; and thanne a morwe erly also the oost sette there tentes a fyre, and wente there wey with sorwe, levynge gret stuff behynden them bothe of vitailes and of other thynges also. And the seconde day of August nest folwynge, the duke of Gloucestre, with the duke of Norfolk, the erle of Warrewyk, the erle of Stafford, the erle of Hunt', the erle of Oxonford, the erle of Devenschire, the erle of Morteyn, and the erle of Uwe, with manye othere lordes, barons, and knyghtes, squyers, and yemen, unto the noumbre of l m^{l} and mo, pa.s.syd over the see with v hundred seyles and mo, and londed at the forseid toun of Caleys; and the iiij day after, they pa.s.syd forth over the water of Gravelynge and comen into Flaundres, where they brenden and sclewe all that they myghte come to xj dayes durynge, in to gret harm of that c.u.n.tre, and pryncypally to the toun of Poperynge and of Belle, where Haukyns drank be note withoughte cuppe; and thanne they turned ageyn and comen hom sauf and sounde, blessyd be G.o.d of his soude. Also this same yere, the xiij day of August, the kyng of Scottes and hys wyf lyenge at the sege of the castell of Rokysburgh, with a gret power of Scottes and a gret ordinaunce brak up the sege and wente his way shamfully, and lefte his ordinaunce and his stuff behynden hym as a coward, and mo thanne vij score of his galyentires sclayn and taken at the same sege: and so myghte he wel sey, that in the crook of the mone com he thedirward, and in the wylde wanyande wente homward:

_With reste and pees, A man schal best encrees._

[Footnote 121: _See note_ AAA.]

REX HENRICUS s.e.xTUS. [1436-1438.]

John Mich.e.l.l, fysshmong', Will'm Gregory, skynn'e. A^{o}. xv^{o}.

maior. Th' Morstede, drap'.[122]

[Footnote 122: "sergman" _in the Cotton MS._]

[Sidenote: Obit' Katerine Re' Angl'.]

[Sidenote: A tour with too arches of London bregge fel don.]

[Sidenote: Obit' Joh'ne regine Angl'.]

[Sidenote: the deth of the lyons.]

This yere, the secunde day of Januar, deyde quene Katerine, the whiche was kyng Herry wyf the fyfthe. Also this yere, the xiiij day of Januar, fyl doun a tour of London bregge toward Suthwerk, with too arches and al that stood therupon.[123] Also this same yere, the ix day of Jull, deyde quen Jane kyng Herry the forthe wyf, that before was d.u.c.h.esse of Bretayne. Also this same yere deyde alle the lyons that weren in the Tour of London, the whiche was nought sen in no mannys tyme before out of mynde.

[Footnote 123: _See note_ BBB.]

Will'm Estfeld, m'c', Will'm Hales, m'c'. A^{o}. xvj^{o}.

maior. Will' Chapman, drap'.

[Sidenote: Oweyn brak prison prevyly, which hadde wedded quen Katerine.]

[Sidenote: Will'm Goodgrom was hangen.]

This same yere on Oweyn, no man of birthe nother of lyflode, brak out of Neugate ayens nyght at serchynge tyme, thorugh helpe of his prest, and wente his wey hurtynge foule his kepere; but at the laste, blessyd be G.o.d, he was taken ayeyn; the whiche Oweyn hadde prevyly wedded the quene Katerine, and hadde iij or iiij^{or} chyldren be here, unwetyng the comoun peple tyl that sche were ded and beryed. Also the same yere on William Goodgrom of London, corsour, for scleynge of a man of court in Hosyere lane be syde Smythfeld, was hangen at Tybourne.

REX HENRICUS s.e.xTUS. [1438-1439.]

Steph'us Broun, maior. Nicholl Yeo, drap'. A^{o}. xvij^{o}.

Hugo d.y.k.e, ser'.

[Sidenote: A gret myschief fell at Baynard castell.]

[Sidenote: Another myschief fell at Bedford.]

[Sidenote: Obit' comit' Warr'.]

[Sidenote: Knyghtes of the bath.]

[Sidenote: A gret derthe of corn.]

[Sidenote: The erle of Hunt' with a faire meyne wente over the see into Gascoigne.]

[Sidenote: Robert Chicheley citezein of London deyde.]

[Sidenote: Bawdes were sett on the pillory, and strompettes were led to Neugate.]

This same yere,[124] upon newe yere day after mete, at Baynard castell fyl a down sodeynly a stak of wode and killed iij or iiij men myschevesly, withoughten othere mo that were there sore hurt. Also anon after at Bedford, on the schire day, weren xviij men at onys murdred myschevously withoughte any strok, in fallynge doun hedlynge at the stayre of there s.h.i.+re-hous, and manye mo foule hurt. Also the laste day of Aprill, at Roane in Normandye died S^{r}. Richard Beauchamp erle of Warwyk, there beynge lieutenaunt undir the kyng, on whos soule G.o.d have mercy! Also the same yere anon after Estre, W.

Estfeld of London, mercere, and Lowys John were made knyghtes of the bathe. Also the same yere was the newe cunduyt in Fletstret begonnen to make. Also this yere was so gret derthe of corn that men were fayn to ete rye bred and barly, the whiche nevere ett non before; and rather thanne fayle, bred mad of benes, peses, and fecches, and wel were hym that might hav ynowe therof; for a bushel of whete was worth iii _s._ at London, and in sum c.u.n.tre derrere; and that mad bakers lordes: but y prey G.o.d nevere let us see that day no more yf his wille be. Also in this same yere wente over the see the erle of Huntyngdon with a faire mene into Gascoigne and Gyan, for to defende that land fro the kynges enemyes. Also the same yere wente the duke of Norfolke, the erle of Stafford, the erchebysshop of York, and othere lordes and bysshoppes over the see to Caleys, for to trete for the pees betwen Engelond and Fraunce and betwen Engelond and Flaundres. Also the same yere deyde a worthy citezein of London, Robert Chicheley, grocer, that yaf to xxiiij hundred men a gret dyner. Also the same yere in hervest tyme weren too baudes sett on the pillory, and iij strompettes were led to Neugate, and there were put on there hedes ray hodees, and with roddes of a cubitt of lengthe in there handes, and so they were leed be the schirreves officers to the pillory in Cornhull, and there was there charge reed, how they schulde be put out of the franchise of London citee, and no more comyn withinne the walles of the citee, but they comen in with there raye hodees on there hedes upon certeyn peyne. Also the same yere in hervest tyme were brent at the standard in Chepe diverses nettes, cappes, sadelys, and othere chaffare, for they were falsly mad and deseyvably to the peple.

[Footnote 124: _See note_ CCC.]

REX HENRICUS s.e.xTUS. [1439-1440.]

Rob't Large, m'c', Robt. Marchall, groc'. Anno xviij^{o}.

meir. Philip Malpas, drap'.

[Sidenote: Obit' comitisse Arundell and Huntyngdon.]

[Sidenote: Maist' Richard was brent as a heretike.]

[Sidenote: Lowlars.]

[Sidenote: Ignis.]

[Sidenote: Ignis.]

[Sidenote: Merchaunts straungers to be oosted with Englisshmen.]

This same yere[125] deyde the countesse of Arundell and of Huntyngdon, in Gascoigne. Also this yere were too bargemen hanged in Tempse beyownde seynt Katerines, for scleying of iij Flemynges and a child, beynge in a schip in Tempse of there contre, and weren homward; and there they hengen til the water hadde wasted them be ebbyng and flowyd, so the water bett upon them. Also the same yere upon a Fryday, that is for to sey the ij^{de} day of August, was on Maister Richard Wyche, sum tyme vicary of Depforde in the schire of Kent, brent for lollery at the Tour hill; and there manye of his secte and of his lord wenten and offred at the same place where he was brent, tyl manye of them were aspyed and put in prison; and for doughte that there schulde a ben a maner of arysyng of suyche mysbelevers, the maire, the schirreves, with alle the aldermen, be comown counseill and comown a.s.sent, dede ordeyne diverses wacches of diverses wardes of the citee, that a certeyn schulde wacchen a day and as manye a nyght at the same place, unto the tyme that the maire with his counseill wolde sende them discharge. Also this same yere on a Fryday, that is for to seye the xij day of August, aboughte iij of the belle at afternoon, there fill a sodeyn thondyr clap with a gret reyn and a lyghtnynge, the whiche lyghtnynge entred in at a wynde and distroyd moche hey which was stuffed in a gret hous at the Sterre in Bredstrete; and the remenaunt of the hey was cast out and had in to Chepe, the quantyte of l cart full: and so, worschepyd be G.o.d, there was not moche more harme do, but palbrakyd sore therein and lost the hey. Also on Fryday xiiij nyght after that, in the nyghtes tyme was a goldsmyth hous be syde the crosse in Chepe althernest the Egle brent, and al that was therinne; but it were the lesse and a part of the tannere at the Egle, and the good man of the Egle hadde moche harm as it was seyd. Also in this same yere began the parlement at Westm' at Mighelmesse ant lasted to Cristema.s.se, and enyorned til after the feste to Redyng in Berkschire, and so it lasted there til Schroftyd, and there endyd; and at the whiche parlement was ordeyned that all marchauntes strangers schulde gon to oost with Englysshmen withinne too dayes after they be comen into the lond, in what partie of the lond soevery thei be, to selle there marchaundyse, and bye ayen withinne viij monthes after there comynge, and gon ageyn withinne the same terme; and in cas that eny of there marchaundyse leve unsold at there partynge, they to have it with them withoughten eny custom payenge; and the goodes that thei bye and selle shall yeven to there hoost for every xx _s._, worth, ij _d._, except the Estirlynges. Also at the same parlement was graunted that the kynges vitaill schulde be payed; and the town of Caleys for to be made ageyn; and the see for to be kept with the V portus of Engelond; and that every houshold of d.u.c.h.e peple shall paye to the kyng be yere xvj _d._, and every servaunt of them shall paye vj be yere. And in this yere come pardon into Engelond fro the pope of Rome, undir his lettre and seall of leed, of as moche power as he has, to every prest to a.s.soilen every Cristeman that yevyth a part of his goodes to the sustentacion of the popes werres in strengthynge of the Cristen feith.

Also in this yere was cried pees betwen Engelond and Zelond, Holond ant Freselond perpetuell. Also in this same yere was a man drawen and hanged, hedid, and quarterd, and sett up at diverses places, for he tok up bestes and all maner vitaill in the c.u.n.tre in the kynges name, and was but a thef, and so robbyd the c.u.n.tre with treson.

[Footnote 125: _See note_ DDD.]

REX HENRICUS s.e.xTUS. [1440-1441.]

Joh'is Paddisle, goldsmyth, Will' Whetenale, groc'. Anno xix^{o}.

m'^{or}. John Sutton, goldsmyth.

[Sidenote: The lady of Gloucestre.]